Swjedźenski akt
Dokładnje 25 lět po swjatočnym wotewrjenju japanskeje twornje za klimowe kompresory w Nadróznej Hrabowce 28.09.2000 bu dźensa šesty twarski wotrězk swjatočnje poswjećeny. Krótko před swojim wotlětom do Taiwana a Japanskeje wobdźěli so ministerski prezident Michael Kretschmer na swjatočnosći a wusměri postrowne słowa na wjace hač sto hosći z regiona a sobudźěłaćerjow.
Wot lěta 2000 produkuje dźowka japanskeju awtomobiloweju dodawarjow Toyoty Industries Corporation (TICO) a Denso Corporation na industrijnišću Nadrózneje Hrabowki, wot 2007 wjesny dźěl susodneho města Njedźichowa, z wjace hač 900 přistajenymi, kompresory za klimowe připrawy wosobowych awtow za produkowarjow awtow cyłeje Europy. TD Deutsche Klima Kompressor GmbH (TDDK) je so w tutym štwórć lětstotku k najwjetšej japanskej inwesticiji w industriji nic jenož w Sakskej a Łužicy, ale we wuchodnej Němskej wuwiła.
Z Japanskeje na jubilej TDDK přijěł je Ken Suito, nawoda jednaćelskeho wobłuka kompresorw a čłon předsydstwa pola japanskeje maćerneje firmy TICO. Wón a wot spočatka lěta pola TDDK skutkowacy prezident a jednaćel Atsuyuki Morishita wobroćištaj so tohorunja z postrownymi słowami na swjedźenskich hosći. Mjez nimi hamtski předchadnik Yoichi Terao, wot 2022-2024 prezident pola TDDK a nětko wuwićowy nawoda w maćernym domje TICO, kiž wjeseleše so nad dokónčenjom w swojim času zastojnstwa zahajeneho wulkoprojekta. W črjódźe hosći z regiona tež krajny rada Udo Witschas, wicekrajna radźićelka dr. Romy Reinisch, Njedźichowski měšćanosta Harry Habel, wyši měšćanosta Kamjenca Roland Dantz, zapósłancaj Sakskeho krajneho sejma Elaine Jenč a Marko Schiemann, hłowny jednaćel Sachsenmetall Matthias Matz, nawoda Domowiny Dawid Statnik, nawoda Sakskeje agentury za strukturne wuwiće Jörg Mühlberg a dalši čestni hosćo zhromadnje z někotrymi swojimi hamtskimi předchadnikami, kotřiž su so nimo swojeho zastojnstwa z dobrymi přećelemi, podpěraćelemi a dowěrnikami TDDK stali, kaž su to bywši ministerski prezident Stanisław Tilich a bywši hłowny jednaćel Sachsenmetall Andreas Winkler.
Sportowje-kulturnje wobrubjeny bu swjedźenski akt wot sportoweje akrobatiskeje skupiny SC Wojerecy, z kotrymž wobsteji sponsoringowe partnerstwo.
Twarska dowolnosć po dwěmaj měsacomaj
W minjenych třoch lětach inwestowachu towaršnicy Toyota-skupiny wospjet 90 milionow eurow do rozšěrjenskeho twara, awtomatiskeho wysokopolcoweho składa a zhotowjenskeje čary za elektrisce ćěrjene kompresory z lijenjom a mašinelnym wobdźěłanjom wonkownych dźělow a montažoweje linije. Elektrokompresory wužiwaja so w jězdźidłach z elektromotorom. Wone woznamjenjeja za TDDK technologiju přichoda při transformaciji k elektromobiliće.
Twarska próstwa za tutón wulkotwarski projekt bu 2023 w běhu wosom tydźenjow přez wokrjes Budyšin přizwolena. Dočasnje běchu so nazymu 2022 wšitcy wobdźěleni z twarskim zarjadom za blido sydnyli, zo bychu hižo w fazy zdźěłanja wobšěrneje twarskeje próstwy móžne přizwolenske zadźěwki zwěsćili a zhromadnje přewinyli. Přidawki k receptej wuspěcha rěkaja potajkim šefowa naležnosć, pilni fachowi eksperća a spěšne rozrisanje problemow, z tym zo wšitcy wotewrjeni a transparentnje mjez sobu rěča. Mjeztym je so tuta běžna přizwolenska procedura k standardej při wulkoprojektach we wokrjesu Budyšin wuwiła a słuži samo w sakskim zarjadnistwje a hospodarskim spěchowanju jako přikładowy model.
Na zakładnej płoninje 108 metrow šěrokosće króć 158 metrow dołhosće su so w šestym dźělu zawoda 17.000 kwadratne metry k 73.000 kwadratnym metram wobstejaceho twarjenja přidružili. Najwažniši dźěl rozšěrjenskeho twara je 74 metrow króć 40 metrow wulki awtomatiski wysokoskład. Po wšěch třoch etažach twarjenja wupřestrěwa so 17 metrow wysoki regalowy twar a skića na 12 runinach městno za wjace hač 13.000 paletow za přiběracu wšelakorosć jednotliwych dźělow a komponentow.
Najebać strukturneje krizy němskeje a europskeje awtoweje industrije ma spočatk přichodneho lěta tež serijowa produkcija nowych elektrokompresorow startować. Naprašowanja dla pak so najprjedy z mjeńšimi mnóstwami započina. Dlěje hač hišće k zazběhej projekta před třomi lětami myslene, wostanje zhotowjenje mechaniskeho kompresora pola TDDK ćežišćo produkcije.
Partnerstwowy jubilej TDDK dobrowólna wohnjowa wobora.
Dalša přičina k swjećenju za TDDK a stejnišćowu gmejnu je dźesaćlětny jubilej zrěčenskeho zhromadneho dźěła mjez TDDK a dobrowólnej wohnjowej woboru Nadrózneje Hrabowki, Njedźichowskim wjesnym dźělu, w kotrymž je TDDK zaměstnjeny. Jenož přez sobudźěłaćerjow TDDK, kotřiž su w swojej domjacej gmejnje kaž tež w Nadróznej Hrabowce čłonojo wohnjoweje wobory (dwójne čłonstwo) a w padźe alarmowanja wućahnu, móže so na dźěłowych dnjach połna zasadźenska zwólniwosć małeje wjesneje wohnjoweje wobory zawěsćić. Kameradojo dobrowólneje wohnjoweje wobory wjeselachu so wosebje, zo bě Stanisław Tilich, kiž bě 2015 patron při spočatku zhromadneho dźěła, tež dźensa pódla. Připódla prajene swjeći dobrowólna wohnjowa wobora Nadrózna Hrabowka lětsa tež swoje stolětne wobstaće.
Zawjazany bě wulki TDDK-swjedźenski dźeń w „EIN:BLICKE“, dźeń wotewrjenych předewzaćow w hospodarskim rumje podłu B97 mjez Ottendorfom-Okrilu a Nadróznej Hrabowku, kotryž so kóždej dwě lěće wotměwa. We wobłuku „wučomniskeho a swójbneho dnja“ wopyta mjez 10 a 14 hodź. zaso daloko wjace hač tysac wopytowarjow TDDK po puću w zawodźe. Nimo wukubłanskich a wysokošulskich partnerow kaž tež ZCOM z Wojerec prezentowachu so na regionalnej čarje tež partnerojo TDDK kaž Krabatowe towarstwo. Kameradojo dobrowólneje wohnjoweje wobory postarachu so z hrochowej poliwku a kołbasu z gulašoweje kanony wo ćělne derjeměće.