TD Deutsche Klimakompresor tzwr (TDDK) je předewzaće japanskeju awtomobilneju dodawarjow Toyota Industries Corporation a Denso Corporation a wodźacy zhotowjer kompresorow za jězdźidłowe klimowe připrawy w Europje.
15.11.2025: Serbski hospodarski forum 2025
Póndźelu, 10.11.2025, wotmě so w Krabatowym młynje Serbski hospodarski forum 2025. Něhdźe 65 zastupjerkow a zastupjerjow hospodarstwa, kultury a politiki so schadźowa, zo bychu wo šansach dwurěčnosće we Łužicy, nowych serbskich předewzaćelskich iniciatiwach a sylnjenju regionalneje identity diskutowali. Přeprosyli běchu Kulturny centrum Krabatowy młyn, TDK-zawod kaž tež Domowina.
Wosebity wjeršk bě swjatočne spožčenje Serbskeho hospodarskeho myta. Po tym slědowachu wjacore fachowe přednoški – mjez druhim k wuznamej serbskeje kuchnje, k aktualnym wuslědkam Łužiskeho monitora z ćežišćom hospodarstwo, k předstajenju projekta ZARI kaž tež k nowym móžnosćam powołanskich wikow na Ralbičanskej wyšej šuli.
Carolina Měršowa, zamołwita za serbske naležnosće pola TDDK, prezentowaše zhromadnje ze Gesine Kutter, prokuristku firmy Corporate friends, nowu syć serbskich předewzaćelkow a předewzaćelow. Pod wodźacym motiwom „Serbstwo.Hospodarstwo.Přichod“ namołwjeja woni k aktiwnemu zhromadnemu dźěłu.
29.10.2025: witachmy skupinu „Domoj“ ZARI-domowiny pola TDDK
Jědnaće angažowanych dorosćenych wěnuje so hižo dźewjeć měsacow dospołnje nawuknjenju serbskeje rěče a pohłubša swoje znajomosće z wulkej zahoritosću. Kóžda a kóždy wobdźěleny ma při tym wosobinski zaměr: serbsce aktiwnje rěčeć a we wšědnym dnju žiwy być. Po tym wotmě so w zwučowanskej rumnosći (BA6) dalekubłanje we wobłuku gramatiki. Wjeselimy so jara nad zajimom, motiwaciju a zhromadnym angažementom za našu mjeńšinowu rěč!
ZARI je projekt pod nošerstwom Domowiny – Zwjazka Łužiskich Serbow, kotryž wot 2022 běži. Zaměr projekta je rewitalizacija serbskeje rěče a regionalneje identity we Łužicy. Jedyn dołhodobny zaměr rěka: hač do lěta 2100 ma w regionje něhdźe 100.000 ludźi dawać, kotřiž serbsce rěča.
We wobłuku ZARI realizuja so wjacore komponenty, mj. dr.: Rěčne kubłanje za dorosćenych, kotřiž chcedźa serbšćinu wuknyć. Motiwacija a přewod ludźi, kotřiž so z rěču a identitu zaběraja („rěčni motiwatorojo“) we wšelakich regionach. Dźěło kultury a towarstwa: podpěra towarstwow a syćow, zo njeby serbšćina jenož rěč wostała, ale so stała dźěl žiweje zhromadnosće.